അപ്സരസ്സ്
പൌരാണിക ഭാരതീയ സങ്കല്പമനുസരിച്ച് ദേവലോകത്തിലെ സുന്ദരിമാരായ നര്ത്തകികള്. 'അപ്'-ല് (ജലത്തില്) നിന്നുണ്ടായവര്, ജലത്തില് സഞ്ചരിക്കുന്നവര് എന്നാണ് വാക്കിനര്ഥം. പാലാഴിമഥനത്തില് ഉയര്ന്നുവന്നവരാണിവരെന്ന് മഹാഭാരതവും രാമായണവും പറയുന്നു. അതിസുന്ദരിയായ രംഭയുള്പ്പെടെയുള്ള അപ്സരസ്സുകളെ ഇന്ദ്രന് ദേവലോകത്തേക്ക് കൂട്ടിക്കൊണ്ടുപോയി. സുമേരുവിന്റെ സാനുപ്രദേശത്ത് ഇവര് നിവസിക്കുന്നു. നൃത്തനൃത്യസംഗീതാദി കലാവിദ്യകളില് പ്രഗല്ഭരായ ഇവര്ക്ക് സദാചാരസംഹിതയൊന്നും ബാധകമല്ല; ഋഷിമാരുടെ തപസ്സിനു വിഘ്നം വരുത്താന് ഇവരെയാണ് ദേവേന്ദ്രന് നിയോഗിക്കുന്നത്. ദ്രുപദര്, ദ്രോണര്, പൃഥു, ശകുന്തള എന്നിങ്ങനെ പുരാപ്രസിദ്ധരായ അനവധിപേര് അപ്സരസ്സുകളില് നിന്നുണ്ടായവരാണ്. വായുപുരാണം പതിനാല് അപ്സര ഗണങ്ങളേയും ഹരിവംശം ഏഴു ഗണങ്ങളേയും പരാമര്ശിക്കുന്നു. ആകെ അറുപതുകോടി അപ്സരസ്സുകളുണ്ടത്രേ; നാലരക്കോടി എന്ന് കാശീഖണ്ഡം. ഇതില് 1,060 പേര്ക്കേ പ്രാധാന്യമുള്ളു. ഉര്വശി, പൂര്വചിത്തി, സഹജന്യ, മേനക, വിശ്വാചി, ഘൃതാചി എന്നിവരാണ് ഉത്തമകള്. രംഭ, തിലോത്തമ, അലംബുഷ, അശ്രുവിന്ദുമതി, ജാനപദി തുടങ്ങിയവരും പ്രസിദ്ധരാണ്. സുരാംഗന, സുമദാത്മജ, സമുദ്രാത്മജ എന്നീ പര്യായങ്ങളിലും അപ്സരസ്സ് അറിയപ്പെടുന്നു.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ