ഇപ്പോള്‍ കോട്ടപ്പുറം എന്നറിയപ്പെടുന്ന സ്ഥലത്ത് മണ്‍കോട്ടയുടെ അവശിഷ്ടങ്ങള്‍ ഉണ്ടായിരുന്നതായി പഴമക്കാര്‍ പറയുന്നു. കോട്ടവഴി എന്നസ്ഥലനാമം ഈ ഊഹത്തെ ബലപ്പെടുത്തുന്നു. കിടങ്ങൂര്‍ എന്ന സ്ഥലനാമത്തെക്കുറിച്ച് മറ്റൊരൈതിഹ്യമുണ്ട്. തമിഴ് നാട്ടില്‍ നിന്ന് ദേവീവിഗ്രഹവുമായി വന്ന ഒരു ഭക്തന്‍ നടന്നു ക്ഷീണിച്ച് അര്‍ദ്ധരാത്രിയില്‍ ഇവിടെ വന്ന് കിടന്നുറങ്ങി. നേരം പുലര്‍ന്നിട്ടും ഉണരാഞ്ഞതുകൊണ്ട് നാട്ടുകാര്‍ അധികാരിയായ അടിയോടി നായരെ വരുത്തി. അദ്ദേഹം ഭക്തനെ ചോദ്യം ചെയ്തപ്പോള്‍ താന്‍ ദേവീവിഗ്രഹം സ്ഥാപിക്കാന്‍ പറ്റിയ സ്ഥലം തേടിപ്പോവുകയാണെന്ന് മറുപടി പറഞ്ഞു. ഇവിടെ ഒരു സുബ്രഹ്മണ്യക്ഷേത്രം സ്ഥാപിക്കണമെന്ന് അയാള്‍ നിര്‍ദ്ദേശിക്കുകയും ചെയ്തു. പിന്നീട് ഭക്തന്‍ ആ ദേവീവിഗ്രഹം കുമാരനെല്ലൂര്‍ പ്രതിഷ്ഠിച്ചു. ഇന്നുകാണുന്ന സുബ്രഹ്മണ്യ ക്ഷേത്രം അധികാരിയും നിര്‍മ്മിച്ചു. അദ്ദേഹം വടക്കു നിന്ന് സാമവേദികളായ ബ്രാഹ്മണരെ വരുത്തി ക്ഷേത്രഭരണം അവരെ ഏല്പിക്കുകയും ചെയ്തു. അങ്ങനെ ഭക്തന്‍ കിടന്ന ഊര് ‘കിടന്നൂര്‍‘ ആയി എന്നും ക്രമേണ അത് ‘കിടങ്ങൂര്‍’ ആയിമാറിയെന്നും ചിലര്‍ അഭിപ്രായപ്പെടുന്നു. മുമ്പ് ഉത്സവത്തോടനുബന്ധിച്ച് മീനച്ചില്‍ ആറിന്റെ മണല്‍പ്പുറത്ത് വാണിജ്യമേള നടന്നിരുന്നു. ലോഹങ്ങള്‍ കൊണ്ടുള്ള വിവിധതരം പാത്രങ്ങളും ഗൃഹോപകരണങ്ങളും പ്രസിദ്ധമായ പിറയാറന്‍ കളിമണ്‍പാത്രങ്ങളും വാങ്ങാന്‍ വിദൂരസ്ഥലങ്ങളില്‍ നിന്ന് പോലും ആളുകള്‍ നമ്മുടെ നാട്ടില്‍ എത്തിയിരുന്നു. ഉത്സവപ്പിറ്റേന്ന് നടത്തിയിരുന്ന കാളച്ചന്തയും പ്രസിദ്ധമായിരുന്നു. തുളളല്‍ പ്രസ്ഥാനത്തിന്റെ ഉപജ്ഞാതാവായ സാക്ഷാല്‍ കുഞ്ചന്‍ നമ്പ്യാരുടെയും കേരളപാണിനി എന്ന അപരനാമത്താല്‍ അറിയപ്പെട്ടിരുന്ന ഏ.ആര് രാജരാജ വര്‍മ്മയുടേയും പിതൃഗൃഹങ്ങള്‍ കിടങ്ങൂര്‍ ആണ് എന്നത് പ്രശംസനീയമാണ്. തിരുവിതാംകൂര്‍ രാജാക്കന്മാരുടെ അക്ഷരഗുരുവായ കിടങ്ങൂര്‍ പിഷാരടി, ഹാസ്യകവിയായ കിടങ്ങൂര്‍ കൃഷ്ണവാര്യര്‍, വലിയ യോദ്ധാവായിരുന്ന കറുകയില്‍ കൈമള്‍, നളനുണ്ണി, പൈങ്കുളം നാരായണചാക്യാര്‍, മിസ്റ്റര്‍ തിരുമേനി എന്നറിയപ്പെട്ടിരുന്ന ചെറുവള്ളി നാരായണന്‍ നമ്പൂതിരി, കൂത്തമ്പലത്തിലെ കുറുന്തോട്ടിത്തൂണ്‍ നിര്‍മ്മിച്ച മഴുവല്ലൂര്‍ കൊല്ലന്‍, തുടങ്ങി പേരുകേട്ട നിരവധി വ്യക്തികള്‍ ചരിത്രത്തിന്റെ ഏടുകളില്‍ കിടങ്ങൂരിന്റെ പേര് എഴുതി ചേര്‍ത്തു. ഉണ്ണിനീലിസന്ദേശം, ആര്യാമൃതം, എതിഹ്യമാല തുടങ്ങിയ ധാരാളം പ്രസിദ്ധകൃതികളില്‍ കിടങ്ങൂരിനെക്കുറിച്ച് പരാമര്‍ശമുണ്ട്. കഥകളി രംഗത്ത് ‘’കിടങ്ങൂര്‍വഴി” എന്ന പേരില്‍ ഒരു കഥകളി രീതി തന്നെ നിലനിന്നിരുന്നു. നൂറ്റാണ്ടുകളായി ഹിന്ദുക്കളും ക്രിസ്ത്യാനികളും ഇവിടെ സഹവര്‍ത്തിത്വത്തോടെ ജീവിച്ചു പോരുന്നു. പ്രസിദ്ധമായ സെന്റ് മേരീസ് ഫെറോനാപ്പള്ളിയിലെ പെരുന്നാളും സുബ്രഹ്മണ്യസ്വാമി ക്ഷേത്രത്തിലെ ഉത്സവവും കിടങ്ങൂര്‍ നിവാസികള്‍ ഒരുപോലെ ആഘോഷിക്കുന്നു. ഓണവും ക്രിസ്തുമസ്സും ഈസ്റ്ററും വിഷുവും പൊതു ഉത്സവമായി മാറിയിരിക്കുന്നു. ഒന്‍പതു വാര്‍ഡുകളിലായി തെരഞ്ഞെടുപ്പു നടത്തി ഇന്നത്തെ രീതിയിലുള്ള പഞ്ചായത്തു ഭരണ സമിതികള്‍ രൂപം കൊണ്ടത് 1953-ലാണ്. കോട്ടയം പട്ടണത്തില്‍ നിന്നും 20 കി. മീ. കിഴക്ക് മീനച്ചിലാറിന്റെ ഇരുവശങ്ങളിലുമായി സ്ഥിതി ചെയ്യുന്ന മനോഹരമായ ഒരു ഭൂപ്രദേശമാണ് കിടങ്ങൂര്‍ ഗ്രാമപഞ്ചായത്ത്. 1956 ല്‍ സ്ഥാപിക്കപ്പെട്ട കേരള ഗ്രന്ഥശാലസംഘം കേരളത്തില്‍ പ്രവര്‍ത്തിച്ച് പോന്ന ഗ്രന്ഥശാലകളെ കോര്‍ത്തിണക്കുന്നതിന് മുഖ്യ പങ്കു വഹിച്ചു. സ്വാതന്ത്ര്യ സമ്പാദന കാലഘട്ടത്തില്‍ തന്നെ കിടങ്ങൂരും പല പ്രദേശങ്ങളിലുമായി 8 ഓളം ഗ്രന്ഥശാലകള്‍ സ്ഥാപിക്കപ്പെട്ടു കഴിഞ്ഞിരുന്നു. അവയില്‍ കട്ടച്ചിറ നേതാജി ലൈബ്രറി, കിടങ്ങൂര്‍ എ. ജി. എം. ലൈബ്രറി, ചെമ്പിളാവ് കെ. സി. വൈ. എം. ലൈബ്രറി, പിറയാര്‍ എ ആര് ആര് വായനശാല, ചേര്‍പ്പുങ്കല്‍ പബ്ളിക് ലൈബ്രറി, കുമ്മണ്ണൂര്‍ ദേശീയ ഗ്രന്ഥശാല എന്നിവയുടെ പ്രവര്‍ത്തനം എടുത്ത് പറയേണ്ടതാണ്. നായര്‍ സര്‍വ്വീസ് സൊസൈറ്റി, ശ്രീനാരായണ ധര്‍മ്മ പരിപാലന സംഘം, വിശ്വകര്‍മ്മ മഹാസഭ, വിശ്വകര്‍മ്മ സര്‍വ്വീസ് സൊസൈറ്റി, വീരശൈവമഹാസഭ, ഹിന്ദുചേകവര്‍ സംഘം, പുലയര്‍ മഹാസഭ, മറ്റുപിന്നോക്ക സമുദായസംഘങ്ങളുടെ തുടക്കം തുടങ്ങി ഒട്ടനവധി ജാതി സംഘങ്ങള്‍ ഈ ഗ്രാമത്തിലുണ്ട്. നിലവില്‍ ഇന്ന് കലാഭ്യാസനം നടത്തിവരുന്ന നള്ളനുണ്ണി സ്മാരക കലാക്ഷേത്രത്തിന്റെ കഥകളി ട്രൂപ്പും ജയകൃഷ്ണാ നൃത്തവേദിയും നടനകലാകേന്ദ്രത്തിന്റെ വേലകളി ഗ്രൂപ്പും, മേച്ചേരില്‍ ശിവരാമമാരാര്‍ സ്മാരക വാദ്യപഠന കേന്ദ്രവും ന്യൂബോയ്സ് വെല്‍ഫെയര്‍ ക്ളബ്ബിന്റെ ബ്രേക്ക് ഡാന്‍സ് ക്ളാസ്സുകളും ശ്രീമുരുക സംഗീത വിദ്യാലയത്തിന്റെ ശാസ്ത്രീയ സംഗീത പഠനക്ളാസ്സും പ്രവര്‍ത്തിക്കുന്നു.
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ