ചേരാത്രിക്കോവിൽ ക്ഷേത്രം

ചേരാത്രിക്കോവിൽ ക്ഷേത്രം

എറണാകുളം ജില്ലയിൽ കലൂർ ദേശത്തു തെക്കു കിഴക്കായി സ്ഥിതി ചെയ്യുന്ന അതിപുരാതന ക്ഷേത്രം. കിരാത ഭാവത്തിൽ പാർവതി സമേതനായ പരമശിവനും ബാലകൃഷ്ണ ഭാവത്തിൽ ചതുർ ബാഹുവായ മഹാവിഷ്ണുവുമാണ് ഇവിടുത്തെ പ്രധാന പ്രതിഷ്ഠകൾ. ശിവനും കൃഷ്ണനും തുല്യ പ്രാധാന്യത്തോടെ ആരാധിക്കപ്പെടുന്ന ക്ഷേത്രമാണ്. ഗണപതി, ശാസ്താവ്, സുബ്രമണ്യൻ, ദുർഗ എന്നീ ഉപദേവതാ പ്രതിഷ്ഠകൾ ഉണ്ട്. ക്ഷേത്ര മതിൽ കെട്ടിന് പുറത്തായി ഭദ്രകാളി ക്ഷേത്രവും നാഗ പ്രതിഷ്ഠയും ഉണ്ട്. ആദിമ കാലത്തു ശിവ പ്രതിഷ്ഠ മാത്രമാണ് ഇവിടെ ഉണ്ടായിരുന്നത്. പിന്നീട് വടക്കു പടിഞ്ഞാറു ദിശയിൽ നിന്നും എത്തപ്പെട്ട വൈഷ്ണവ ചൈതന്യം ഇവിടെ പ്രതിഷ്ഠിക്കപ്പെട്ടു. ഇവിടുത്തെ വിഗ്രഹങ്ങൾ യാതൊരു കാരണവശാലും ഒരു ശ്രീകോവിലിനുളിൽ പ്രതിഷ്ഠിക്കാൻ പാടില്ലാത്തതാണ്. പക്ഷേ രണ്ടു ശ്രീകോവിലിലായി തുല്യ പ്രാധാന്യത്തിൽ പ്രതിഷ്ഠിക്കേണ്ടതുമാണ്. കൂട്ടി ചേർക്കാൻ പറ്റാത്ത രണ്ടു ശ്രീകോവിലുകൾ ഉള്ള ഇടത്തിനു ‘ചേരാ - തൃക്കോവിൽ’ എന്നു പേര് വന്നു എന്നാണ് അനുമാനം. ഇവിടുത്തെ ശിവലിംഗം വളരെ പഴക്കമുള്ളതും മഹാ ലിംഗങ്ങളുടെ ഗണത്തിൽ വരുന്നതുമാണ്. ശിവനും കൃഷ്ണനും തുല്യമായി ഉഷഃ പൂജ, ഉച്ച പൂജ, അത്താഴ പൂജ എന്നിവ നടത്തുന്നു. മുൻകാലങ്ങളിൽ ശരിയായ അറിവ് ഇല്ലാതിരുന്നത് മൂലം ‘ ശ്രീകൃഷ്ണ സ്വാമി ക്ഷേത്രം ‘ എന്നാണ് അറിയപ്പെട്ടിരുന്നത്. എന്നാൽ ഇതു മുമ്പു ശിവ ക്ഷേത്രം ആയിരുന്നതും പിന്നീട് വൈഷ്‌ണവ പ്രതിഷ്ഠ നടത്തിയതും ആയ ശിവനും കൃഷ്ണനും തുല്യ പ്രധാന്യമുള്ള ക്ഷേത്രമാണ്. മീന മാസത്തിലെ തിരുവോണം നാളിൽ ആറാട്ട് വരത്തക്ക വിധത്തിൽ എട്ടു ദിവസത്തെ ഉത്സവമാണ് ഇവിടെ. കൊടിയേറ്റ് വിഷ്ണുവിന് മാത്രമാണ് ഉള്ളത്. ഉത്സവ ദിവസങ്ങളിൽ അകത്തെ ചടങ്ങുകൾ ശിവനും കൃഷ്ണനും തുല്യമായി നടത്തുന്നു. വലിയ വിലക്ക് നാളിൽ ശിവനെയും കൃഷ്ണനെയും ഭദ്രകാളിയെയും കൂട്ടി എഴുന്നള്ളിക്കുന്നു. ഗരുഡ ധ്വജവും ശിവനും കൃഷ്ണനും തുല്യമായ വലിയ ബലിക്കല്ലുകളും ക്ഷേത്രത്തിൽ കാണാം. ഇടപ്പള്ളി കുറുമൂർ മനയാണ് ക്ഷേത്രം ഊരാളൻമ്മാർ. പാരമ്പര്യമായി ഏരൂർ പുലിയന്നൂർ മനക്കാണ് താന്ത്രികാവകാശം. ഈ ക്ഷേത്രത്തിന്റെ ഉത്ഭവത്തെ കുറിച്ചോ പ്രതിഷ്ഠിച്ച സമയത്തെ കുറിച്ചോ കൃത്യമായ രേഖകൾ ഒന്നും തന്നെ ലഭ്യമല്ല. ദേവ പ്രശ്ന വിധി അനുസരിച്ചുള്ള ആരാധനാക്രമങ്ങൾ ആണ്‌ ക്ഷേത്രത്തിൽ ഉള്ളത്. ഇഹലോകത്തിൽ ഉള്ള എല്ലാവിധ ദോഷ പരിഹാരങ്ങൾക്കും ശൈവ വൈഷ്ണവ ചൈതന്യങ്ങൾ ഒരുമിച്ചു കുടിയിരിക്കുന്ന ഇവിടുത്തെ പ്രാർത്ഥന അതി വിശിഷ്ടമാണ്. ശിവന്റെയും കൃഷ്ണന്റെയും എല്ലാ വിശേഷ ദിവസങ്ങളും ഇവിടെ ആചരിക്കുന്നു.

ഓം നമഃ ശിവായ… ഓം നമോ നാരായണായ..