നിലവിളക്കു കൊളുത്തുമ്പോൾ, അറിയണം 8 കാര്യങ്ങൾ!

നിലവിളക്കു കൊളുത്തുമ്പോൾ, അറിയണം 8 കാര്യങ്ങൾ!

ഐശ്വര്യത്തിന്റെ പ്രതീകമായ നിലവിളക്കു ദിനവും കൊളുത്തുന്ന പതിവ് കേരളീയ സംസ്കാരത്തോളം പഴക്കമുള്ള ഒന്നാണ്. അന്ധകാരമകറ്റി ജീവിതത്തെ പ്രകാശപൂരിതമാക്കാനുള്ള പ്രാർത്ഥനയെന്നോണമാണ് നിലവിളക്കു കൊളുത്തുന്നത്. എന്നാൽ നിലവിളക്കു കൊളുത്തുമ്പോൾ ശ്രദ്ധിക്കേണ്ട ചില കാര്യങ്ങളുണ്ട്. അവ എന്താണെന്നു നോക്കാം.

വിളക്കു വെറും നിലത്തു വയ്ക്കരുത്

ഓട്, വെള്ളി, പിത്തള, സ്വര്‍ണ്ണം എന്നീ ലോഹങ്ങളിൽ നിർമ്മിച്ച നിലവിളക്കുകവാണ് ദിനവും കൊളുത്തേണ്ടത്. ബ്രഹ്മാ-വിഷ്ണു-മഹേശ്വരൻമാരുടെ ചൈതന്യം ഉൾക്കൊള്ളുന്ന നിലവിളക്കിനെ ദേവിയുടെ പ്രതിരൂപമായാണ് കണക്കാക്കുന്നത്. ഈ ചൈതന്യശ്രോതസ്സിന്റെ ഭാരം ഭൂമീദേവിക്കു നേരിട്ടു താങ്ങാനാവില്ല എന്നാണ് വിശ്വാസം. അതിനാൽ പീഠത്തിനു മുകളിൽ വച്ചാണ് വിളക്ക് കൊളുത്തേണ്ടത്.

നിലവിളക്ക് ശുദ്ധിയോടെ സൂക്ഷിക്കണം

നിലവിളക്കിനുണ്ടാകുന്ന അശുദ്ധി കുടുംബത്തിന്റെ മുഴുവൻ ഐശ്വര്യത്തെ ബാധിക്കുമെന്നാണ് വിശ്വാസം. അതിനാൽ ദിനവും കഴുകി മിനുക്കിയ ശേഷം മാത്രമാവണം വിളക്കു കൊളുത്തേണ്ടത്. വിളക്കു തെളിയിക്കുന്ന വ്യക്തിക്കും തിക‍ഞ്ഞ ശുദ്ധി ഉണ്ടായിരിക്കണം. തുളസിയിലകൊണ്ടു വെള്ളം തളിച്ച് സ്ഥലശുദ്ധി വരുത്തണം.

ദേഹശുദ്ധി നിർബന്ധം

ദേഹശുദ്ധി വരുത്തിയ ശേഷം മാത്രമേ വിളക്കു കൊളുത്താവൂ. ഈ സമയം പാദരക്ഷകൾ ഉപയോഗിക്കയോ കൈയ്യടിക്കുകയോ ചെയ്യുന്നത് ഐശ്വര്യക്കേടായി കണക്കാക്കുന്നു.

പുലർകാലത്തും സന്ധ്യാസമയത്തും വിളക്കു കൊളുത്തണം

പല വീടുകളിലും സന്ധ്യാസമയത്തു മാത്രം വിളക്കുകൊളുത്തുന്നതാണ് പതിവ്. ആദിത്യ ദേവനെ വണങ്ങുന്നതിനാണ് നിലവിളക്കു കൊളുത്തുന്നത്. അതിനാൽ സൂര്യോദയത്തിലും അസ്തമയസമയത്തും നിലവിളക്ക് കൊളുത്തേണ്ടതുണ്ട്. രണ്ടു സമയങ്ങളിലും തിരി കൊളുത്തുന്നതിലും ശ്രദ്ധിക്കണം. പ്രഭാതത്തിൽ ഉദയ സൂര്യനെ നമിക്കുന്നതിനായി കിഴക്കു ഭാഗത്തെ തിരിയും സായാഹ്നത്തിൽ അസ്തമയ സൂര്യനെ വണങ്ങി പശ്ചിമദിക്കിലേയ്ക്കുള്ള തിരിയുമാണ് ആദ്യം കൊളുത്തേണ്ടത്.

തിരികളിടുമ്പോൾ

കിഴക്കു ദിക്കിലേക്കും പടിഞ്ഞാറു ദിക്കിലേക്കും ഈരണ്ടു തിരികളിട്ട് വിളക്കു കൊളുത്തണമെന്നാണ് പ്രമാണം. രണ്ടു തിരികളിടുന്നതിലൂടെ ധനവൃദ്ധിക്കും അഞ്ചുതിരികൾ കൊളുത്തുന്നത് സര്‍വൈശ്വര്യത്തിനും കാരണമാകും. ഒറ്റത്തിരിയിട്ടു കൊളുത്തുന്നതു മഹാവ്യാധിയെ ക്ഷണിച്ചു വരുത്തും. മൂന്നു തിരികളും നാലു തിരികളുമിടുന്നത് ദാരിദ്ര്യത്തിന് കാരണമാകുമെന്നാണ് വിശ്വാസം. വിളക്കിലെ എണ്ണമുഴുവന്‍ വറ്റി കരിന്തിരി കത്തുന്നത് അശുഭമാണ്.

ഊതി കെടുത്തല്ലേ!

‌തിരികളണയ്ക്കുമ്പോൾ ഊതി കെടുത്തരുത്. പുഷ്പം ഉപയോഗിച്ച് കെടുത്തുന്നതാണ് ഉത്തമം.

വിളക്കിലുപയോഗിക്കേണ്ട എണ്ണ

പാചകം ചെയ്ത എണ്ണയോ, വെള്ളം കലർന്ന എണ്ണയോ നിലവിളക്കിൽ ഉപയോഗിക്കരുത്. മൃഗക്കൊഴുപ്പിൽ നിന്നെടുത്ത എണ്ണ ഉപയോഗിക്കുന്നതും ദോഷകരമാണ്. എള്ളെണ്ണ ഉപയോഗിക്കുന്നത് ഉത്തമമായി കരുതുന്നു

വിളക്ക് വയ്ക്കുമ്പോള്‍ ചൊല്ലേണ്ട മന്ത്രം

ഹിന്ദു ഭവനങ്ങളില്‍ സന്ധ്യയ്ക്ക് വിളക്ക് വയ്ക്കുക പ്രധാന മതപരമായ ചടങ്ങാണ്. ഈ പതിവ് തുടങ്ങുകയും ഇടയ്ക്ക് വച്ച് നിര്‍ത്തുകയും ചെയ്യുന്നത് ദോഷമാണ്.സന്ധ്യയ്ക്ക് വിളക്ക് വയ്ക്കുന്ന സമയത്ത് പലതരത്തിലുള്ള മന്ത്രങ്ങള്‍ നിലവിലുണ്ട്. അവ പ്രാദേശിക ഭേദം അനുസരിച്ച് മാറിമറിയിരിക്കുമെന്നു മാത്രം.എന്നാല്‍ ഏതു സമയത്തും ഏതു നാട്ടിലും ഉപയോഗിക്കാവുന്ന ഒരു മന്ത്രമാണ്

"ഓം ശ്രീം ലക്ഷ്മിപ്രിയായവിഷ്ണു മൂര്‍ത്തയേ ശ്രീം നമ:"

എന്ന മന്ത്രം
ജപിച്ചുകൊണ്ട് വിളക്ക് കൊളുത്തുന്നത് ഉത്തമം. പലരും പൂജാ പൂക്കള്‍ പറിക്കുമ്പോഴും തുളസി കതിര്‍ നുള്ളുമ്പോഴും മന്ത്രങ്ങള്‍ ചൊല്ലാറുണ്ട്.എന്നാല്‍ കേരളീയ ആചാര പ്രകാരം ഇങ്ങനെ ചെയ്യുന്നത് ശരിയല്ല. എന്നാല്‍ മന്ത്രങ്ങള്‍ ചൊല്ലുമ്പോള്‍ പറിക്കുന്ന പൂക്കള്‍ നിര്‍മ്മാല്യമായി മാറുന്നു എന്നാണ് സങ്കല്‍പ്പം.